ഫിഫ ക്ലബ്ബ് ലോകകപ്പ്; ജാക്ക് ഗ്രീലിഷിനെ ടീമില്‍ നിന്ന് പുറത്താക്കി മാഞ്ചസ്റ്റര്‍ സിറ്റി

വരാനിരിക്കുന്ന ഫിഫ ക്ലബ്ബ് ലോകകപ്പിനുള്ള ടീമിൽ‌ നിന്ന് ഇം​ഗ്ലണ്ട് താരം ജാക്ക് ​ഗ്രീലിഷിനെ പുറത്താക്കി മാഞ്ചസ്റ്റർ സിറ്റി. ജൂൺ 15ന് അമേരിക്കയിൽ ആരംഭിക്കുന്ന ടൂർണമെന്റിന് വേണ്ടി സിറ്റി കോച്ച് പെപ് ഗ്വാർഡിയോള 27 അംഗ ടീമിനെ പ്രഖ്യാപിച്ചിരുന്നു. ഈ ടീമിൽ നിന്നാണ് ഇം​ഗ്ലീഷ് ഫോർവേർഡ് ഗ്രീലിഷിനെയും മുൻ ക്യാപ്റ്റൻ കെയ്ൽ വാക്കറെയും ഒഴിവാക്കിയത്.

35 കളിക്കാരെ വരെ ടീമിൽ ഉൾപ്പെടുത്താൻ അനുവാദമുണ്ടായിരുന്നിട്ടും ​ഗ്രീലിഷിനെയും കെയ്ൽ‌ വാക്കറെയും ഒഴിവാക്കിയത് ശ്രദ്ധേയമായി. സിറ്റിയുടെ ഏറ്റവും പുതിയ നാല് സൈനിംഗുകളായ റയാൻ ചെർക്കി, റയാൻ ഐറ്റ്-നൂറി, ടിജാനി റെയ്ൻഡേഴ്സ്, മാർക്കസ് ബെറ്റിനെല്ലി എന്നിവരെല്ലാം ടീമിൽ ഉൾപ്പെടുത്തിയിട്ടുമുണ്ട്. അടുത്തിടെ കാൽമുട്ടിനേറ്റ പരിക്കിൽ നിന്ന് തിരിച്ചെത്തിയ സ്പാനിഷ് താരം റോഡ്രി ഉൾപ്പെടെയുള്ള പ്രധാന താരങ്ങളും ടീമിലുണ്ട്.

അതേസമയം ജാക്ക് ​ഗ്രീലിഷിന് സിറ്റിയിൽ ഫോം കണ്ടെത്താൻ ബുദ്ധിമുട്ടിയിരുന്നു. കൂടുതൽ സമയം കളിക്കാനും ​ഗ്രീലിഷിന് സിറ്റിയിൽ അവസരം ലഭിച്ചിരുന്നില്ല. 2024-25 സീസണിൽ ഏഴ് പ്രീമിയർ ലീഗ് മത്സരങ്ങളിൽ മാത്രമാണ് ​ഗ്രീലിഷ് ആദ്യ ഇലവനിൽ ഇടം നേടിയത്. ക്രിസ്റ്റൽ പാലസിനെതിരെ പരാജയപ്പെട്ട എഫ്എ കപ്പ് ഫൈനലിലും 29കാരനായ ഗ്രീലിഷിനെ കളത്തിലിറക്കിയിരുന്നില്ല.

2021ൽ ആസ്റ്റൺ വില്ലയിൽ നിന്ന് 100 ദശലക്ഷം പൗണ്ടിന് സിറ്റിയിലെത്തിയ ഗ്രീലിഷിന് രണ്ട് വർഷത്തെ കരാർ അവശേഷിക്കുന്നുണ്ട്. എന്നാൽ‌ ക്ലബ്ബ് ലോകകപ്പിനുള്ള ടീമിൽ നിന്ന് പുറത്താക്കിയതോടെ താരത്തിന്റെ ഭാവിയും അനിശ്ചിതത്വത്തിലായിരിക്കുകയാണ്.

Content Highlights: Jack Grealish left out of Man City squad for FIFA Club World Cup